السادة الكرام السلام عليكم ورحمة الله وبركاتة اليوم موعدنا مع بداية سرد للصندوق الأسود للمخابرات المصرية كما كان يلقبة القريبين منة أو الصقر الذهبى كما كانت تلقبة أجهزة المخابرات العالمية .
اليوم يحين موعدنا مع فترة هامة جدا من تاريخ مصر المعاصر سوف تساعدنا على فهم الكثير مما يدور حولنا الأن وكان البطل الحقيقى لهذة الفترة هو اللواء عمر محمود سليمان .
*لقد عاصر عمر سليمان حرب النكسة 1967 وإنتصار أكتوبر 1973 وتم تعيينة نائب لرئيس جهاز المخابرات فى عام 1986 ثم تولى رئاسة الجهازالمخابرات الحربية فى1991ثم رئاسة المخابرات العامة فى 22 يناير 1993 كانت من سماتة الرئيسية انة نادرا ما تجدة مبتسما وكانت ملامح وجه حادة الطباع وهو رجل صعيدى بمعنى الكلمة وكان يوميا يتناول وجبة الإفطار ( سندوتشات فول وطعمية من عند جاد ) وكان السواق الخاص بتاعة هو المسئول عن توفير السندوتشات يوميا وكان بيركن العربية بعيد عن المحل ويتمشى على رجلة ويجيب الكباب الشعبى كما كان يسمية اللواء عمر سليمان دون ان يخبر اى شخص لمن سوف يتم توجيه هذة الوجبة وغالبا ما كانت تفهم انها خاصة بالسائق وكان بطلنا يعشق حاجة اسمها عصير برتقال فريش ودايما تلاقية موجود فى المكان اللى هو موجود فية .
"https://ar.wikipedia.org/w/index.php?title=%D8%B9%D9%85%D8%B1_%D8%B3%D9%84%D9%8A%D9%85%D8%A7%D9%86&oldid=27735877",* كان الله يرحمة ويديلة الصحة وطولة العمر بيعشق حاجة اسمها صيد السمك وكان دايما بيروح يصطاد فى الاسماعيلية وكان عندة شقة خاصة بية فى فايد وكان دايما بيحب يتمشى وسط الناس البسيطة بدون حراسة فقط متخفيا خلف نظارة سوداء كبيرة وكان يعشق ام كلثوم وفوزى ومحمد عبد الوهاب ولما كان بيشغل بالة موضوع او يحب يرسم خطة او يظبط حاجة كان علطول يروح على الاسماعيلية ويصطاد ويرتب افكارة هناك .
** ايام ثورة 25 يناير امتنع عن الاكل لفترة وكان عايش على العصير لفترة لدرجة ان الكل لاحظ ان صحتة مش تمام وان وزنة نزل بشكل واضح لدرجة ان بدأ يشترى ملابس وبدل جديدة وفى احد الايام رجع البيت وكان متنرفز جدا حتى ملعبش مع حفيدة كعادتة اليومية لدرجة ان زوجتة قالتلة مالك يا ابو رانيا زى ما كانت متعودة تقولة وكان ردة مصر حتضيع والاخوان باعو البلد للأمريكان مش هى دى مصر اللى انا اعرفها ومش هما دول ناسها الاخوان عايزيين يخربوا البلد وفى الفترة دى كان لسة متعينش نائب للرئيس بس كان الاخوان خلاص ركبوا الثورة وبدأوا يحركوا الناس بشعاراتهم الدينية المزيفة .
ولما مراتة وبنتة سمعوا خطاب مبارك وتعيين عمر سليمان نائب لية قعدوا يعيطوا علشان عرفوا ان المسئولية كبيرة وان مبارك بيحط الراجل بتاعة فى وش المدفع .
وفيوم 30 يناير اتعرض الصقر لمحاولة اغتيال فاشلة ومحدش من اهلة عرف الخبر غير لما اتزاع على قناة فوكس نيوز الامريكية ويومها مراتة قالتلة انت لازم تقعد فى البيت انت يا اما حتموت من قلة الاكل او برصاصة ورد عليها وقالها مصر فى خطر اكبر من الخطر اللى انا فية وقبل ماتسئلنى انت عرفت الحوارات الاسرية دى منين حقولك ان الحكايات دى من لسان بنتة رانيا فى احد اللقاءات التليفزيونية المسجلة اما بالنسبة لمحاولة الاغتيال حنرجع لها بالتفصيل فى الاجزاء القادمة وساعتها عايزك انت اللى تستنتج مين اللى كان ورا محاولة الإغتيال دى منتا لازم تشغل مخك معاية مش كل حاجة حتلاقينى جايبهالك كدة على ظهر سفينة الصحراء .
* فى احد جلاسات الصقر مع بعض من المقربين منة قالهم ان اكتر حاجة هو خايف منها على مصر هى الناس المحيطة بمبارك وقال باللفظ كدة دول بيتصرفوا ولا كأنها عزبة ابوهم واوعى تنسى ابو حديدة اللى ظهر فجأة وأنتشر زى السرطان فى كل ارجاء الدولة وبردوا حييجى دورة ونتكلم علية وخلى بالك انا حبقى اسألك على الاسماء الوهمية دى وعايز اجابتك فى التعليقات علشان اشوفكم مصحصحيين معايا ولا انتم فى التراوة .
* لما فيوم الشيخ زايد الله يرحمة سألة عن التوريث قالة مصر اكبر من اى انسان ومفيش حد يعرف يفرض حاجة على شعب عنيد بطبيعتة .
* كان عمر سليمان على يقين تام بمخاطر فكرة التوريث وانها سوف تقضى على نظام مبارك بالكامل لدرجة انة فى عام 2006 نصح مبارك انة يخلى جمال يسافر برة مصر لفترة وقالة التقارير اللى عندى مفادها ان الشعب بيتكلم كتير عن موضوع التوريث وجمال فى خطر فياريت يسافر برة مصر فترة كدا لحد الأمور لما تهدى لكن كان للمدام رأى اخر وطبعا كلامها هى اللى مشى وجمال مسافرش وفضل يستفز فى الشعب بتصرفاتة هو وصديقة المقرب وكان الشحن ضد جمال وفكرة التوريث فى تزايد ولكن شلة المنافقين والمنتفعيين كانت مبينة لجمال ولمامتة ان الصورة وردية مع العلم ان الباشا كان دائما ما يحذر من انفجار فى اى لحظة بناء على تقارير كثيرة ولكن مبارك كان لا يهتم بها .
* ادركت المدام ان اول عقبة واخطر عقبة فى طريق جمال هو عمر سليمان فبدأت تلعب فى دماغ مبارك ان عمر بيكرة جمال وانة طامع فى الكرسى وانة مستنى اللحظة المناسبة لكن مبارك كان على يقين ان عمر سليمان لا يمكن ان يفع مثل ذلك بل كان يسمية رجل المفاوضات الصارم ورجل مفاوضات الغرف المظلمة وبالنسبة للمفاوضات دى حيجلها وقتها ونحكيها بالتفصيل علشان الراجل دة فعلا صعب التعويض علشان كدة ان شاء الله ربنا حيحافظ علية للوقت المناسب علشان يظهر بكامل قوتة وعايزك كدة تقرأ الحلقات التلاتة بتوع معركة الاسكندرية وتربط الصفات والعلامات الموجودة فى الكلام بعمر سليمان .
** كان على يقين تام بأن الصحافة والأضواء تحرق السياسى فكان من اولى قراراتة عند تعيينة فى منصب رئيس جهاز المخابرات ان اسند الى مدير مكتبة ان يتصل بالصحافة ويطلب منهم عدم التركيز مع الباشا وعدم نشر اى اخبار تخصة وعدم نشر صور لية الا للضرورة وهذا طبيعى فقد قالت عنة المخابرات الامريكية انة الصندوق الاسود لأسرار مصر وانة اكثر من تولى هذا المنصب دهاءا وذكاء .
نكتفى بهذا القدر اليوم ولكن من اجل التفاعل عندى سؤالين
1- مين اكتر واحد كان لية مصلحة فى موت عمر سليمان فى هذة الفترة من تاريخ مصر؟ ( اسم محدد )
2- مين هو ابو حديدة اللى كان مبرتع فى القصر الرياسى ؟
وعلى موعد بلقاء غدا ان شاء الله .
ولاء الدين حسن
بيحبك يا مصر
