--{{ القوات الخاصه المصريه }}--
■■ أنتشر على المدعوق الفيسبوك والزفت تويتر بوستات وتويتات عن عمليات تقوم بها الفرقه 777 والفرقه 999 بدون وعى أو إدراك لطبيعة عمل وتخصصات هاتين الفرقتين والمدهش يامؤمن أن السينارست اللى بيألف البوست علشان المدعوق الشير واللايك يسيب لك رابط المصدر وتكتشف أن المصدر لمدونة شخص عادى لايفقه شئ فى العلوم العسكريه ولحد هنا تقدر تعتبر البوست أنتهى لكن تعالى نوضح بعض النقاط المغلوطه
■■ قبل البدء فى التفاصيل لازم تعرف أن القوات الخاصه هى الصاعقه والمظلات والأستطلاع وهى ليست أسلحه فى الجيش زى سلاح القوات الجويه أو البحريه أو المدفعيه أو الدفاع الجوى ولكنها قوات تتبع قوات المشاه أو القوات البريه
■■ بعد حرب عام 1973 والبطولات الخارقه للنواميس الطبيعيه التى حققتها قوات الصاعقه قرر السادات تطوير هذه القوات بتدريبات خاصه لفئات معينه بتكوين نفسى وجسمانى عالى وطلب من العسكريين تقرير عن ذلك وخلى بالك معايا وركز قوى علشان فيه 100 قصه ورا القصه دى .... تم ترشيح العقيد نبيل شكرى لمهمة تكوين نواه لقوات خاصه لعمليات خاصه جدا وتم أنشاء المجموعه 999 تحت مسمى القوات الأنتحاريه والمجموعه 777 تحت مسمى قوات مكافحة الأرهاب والمجموعه الأخيره دى تم أنشائها خصيصا لحماية وحراسة الطائرات المصريه والسفارات المصريه بعد أنتشار ظاهرة خطف طائرتنا وأستهداف سفاراتنا من قبل الفلسطنيين عقب توقيع أتفاقية كامب ديفيد ومن يومها أصبحت المجموعه 777 مخصصه لحراسة طائرات شركاتنا الوطنيه وسفرائنا ودبلوماسينا والشخصيات المهمه ونجحت بشكل رائع فى ذلك
■■ نعود للمجموعه 999 ومن مسماها تستطيع أن تستكشف مهامها فهى قوات خاصه ذو تدريب عالى ورفيع للقيام بعمليات فى قمة الخطوره وكانت أشهر عمليتها عملية لارناكا اللى محتاج أتكلم فيها وقريب جدا لأن فيها معلومات وأحداث مغلوطه ... المهم بعد قواتنا مارجعت من قبرص استقبلهم السادات فى المطار ورقى العقيد نبيل شكرى لرتبة لواء متخطيا رتبة عميد وتم تعينه قائدا لقوات الصاعقه فى سابقه لاتتكرر كثيرا فى قوات الصاعقه حيث يتولى إدارتها غالبا عميد ودى قصه تانيه طويله لأن مش كل ظابط بيدخل الصاعقه ويظل فيها بالعكس أى تقصير فى التدريبات أو الفرق بيتم أستبعاده ونقله لقوات المشاه وعلشان كده الرتب الكبيره نادره نوعا ما فى الصاعقه والمظلات
■■ المجموعتان تتبعان قيادة القوات الخاصه إداريا وتدريبياً لكنهم تحت تصرف رئيس الجمهويه مباشرةً لكن مايميز المجموعه 777 أنها لاترتدى الزى العسكرى نظرا لطبيعة عملها وأنما ترتدى الملابس المدنيه وتنتهى خدمة الفرد فيها بعد سن معينه يعنى لما ينزلك صوره لقوات يقال انها من المجموعه 777 بملابس عسكريه أعرف أنها صور هجص وحنعرف ده من طبيعة تدريباتها فهى مجموعه أفرادها تعمل بشكل شبه فردى وأن كان التدريب بشكل جماعى لكن مش تدريب زى ماحضرتك فاهم 300 مثلا بيتدربوا مع بعض وغالبا بيكونوا 10 على الأكثر
■■ كيفية اختيارهم وتدريبهم ؟؟؟ ..... بعد حصول فرد الصاعقه أو المظلات على فرقة الصاعقه أو المظلات الراقيه وليست العاديه ودى للمتطوعين والظباط المصريين وظباط الدول الأخرى اللى بيجوا يتدربوا عندنا وفيه أتفاقيات تدريب مع دولهم وظباط ومتطوعى أسلحه أخرى أسلحتهم محتاجه أشخاص معينه بتدريب معين فى نهاية الفرقه بيتم فيه تقييم للأفراد دى عن طريق النقاط التى جمعوها أثناء تدريبهم والحاصلين على درجات مرتفعه بيتم ترشيحهم للأنضمام للمجموعتان 777 و 999 وبعد أجازه بسيطه من العذاب اللى شافه فى الفرقه الراقيه بيدخل فى تدريبات فرق أخرى حسب المجموعه اللى حينضم لها والكلام اللى حقوله يعرفه الخبراء العسكريين معانا وقبل الفرد ماينضم للقوات دى لابد يكون حصل على عدة فرق هامه وخطيره زى المظلات لأفراد الصاعقه والصاعقه لأفراد المظلات وجميع فرق المركبات وجميع فرق الرمايه الحره وفرقة بحريه وفرقة غطس وفرقة تلاحم بدون سلاح وفرقة موتسيكلات وفرق كثيره تخص كل مجموعه على حده زى فرقة هبوط بطائره بمساعدة برج المراقبه بالنسبه للمجموعه 777 لأن ممكن جدا الطيار ومساعده يتقتلوا فى عمليه فى الطياره ولابد لفرد الحراسه يعرف يتعامل مع أجهزة الطياره وينزلها بمساعدة برج المراقبه وده أحتمال وارد جدا
■■ الفرق التدريبيه المتخصصه التى يحصلون عليها كثيره وهامه حسب مهمة المجموعه وحديك مثال بسيط جدا وأكيد خدت بالك لما بيجى مسئول يركب عربيته فرد الحراسه بتاعه أحيانا بيحط ايده على راس المسئول وهو بيركبه العربيه ودى بيبقى متدرب عليها كويس لغرض معين وأكيد خدت بالك أن معظمهم حاطين الطبنجات فى الجانب الأيمن ودى أيضا لها قصه كبيره وفيه تدريبات معينه زى مابنقول بيالبلدى وقت الأزمات أزاى يعرف يكتف المسئول ويطبقه ويكلفته ويدخله السياره فى 5 ثوانى بدون مايعرض أى جزء فى جسمه للخطر والأجهزه الى بيحطوها على ودانهم للتواصل مع قياداتهم الميدانيه ولازم تبقى عارف أن فرد 777 عنده القدره ومدرب تدريب عالى وراقى جدا أزاى يتعامل مع أى موقف وعنده قدره عاليه جدا للتعامل بالسلاح مع أكتر من هدف فى وقت واحد
■■ ملخص كلامى أن اللى بيتقال على السوشيال ميدا عارٍ من الصحه وكلها بوستات ومدونات وأخبار ملفقه والمجموعه 999 قوات انتحاريه تحركها فى أضيق الحدود وبناءاً على تعليمات مباشره من رئيس الجمهوريه لأنك لو عرفت الفرد متكلف على البلد كام تدريب فقط حتقع من طولك يبقى صعب جدا جدا أنك تحطه فى مهمه فرد الصاعقه العادى ممكن يقوم بيها
■■ معلشى وفرصه أقول لك على قصة اللواء نبيل شكرى وازاى السادات بعد مارفعه فوق قوى عزله من قيادة قوات الصاعقه لأنى خدمت فى الصاعقه فى نفس التوقيت وشفته بعينى فى أحدى التدريبات اللى حضرها لتحفيزنا ومتذكرها جدا وكانت فى طابور التجديف وكان نفسى أسلم عليه لكن طبعا ممنوع
■■ بعد عودة نبيل شكرى من عملية قبرص زى ماوضحت تمت ترقيته وتعينه قائد لقوات الصاعقه برتبة لواء وماشاء الله عليه كان سنه وقت خدمتى يقترب من 40 عام لكن صحه وخفه ومرونه وكأنه شاب أبن 20 سنه وشفته بعينى وهو بينزل من طائرته وهى ماشيه بسرعه عاليه جدا فى الجو وعلى نقطه محدده وكان مثال قوى يحتذى به لكل أفراد الصاعقه وكنت وقتها فرد عادى بالصاعقه علشان محدش يضحك عليك ويقولك أنى كنت وزير الدفاع مثلا .... المهم نبيل شكرى عمل تطوير رهيب فى تدريبات الصاعقه وكل أفراد الصاعقه أحبته وكانت شعبيته وحب القوات له محل كلام كل القوات ومعاملته الأخويه الحنونه لأفراد قوات الصاعقه جعلت منه بطل أسطورى لقوات الصاعقه وفى مره زوجة قائد الجناح الخاص بمدرسة الصاعقه (( الجناح الخاص أقوى أجنحة مدرسة الصاعقه وأعنفها تدريبا )) حصلت مشاده بينها وبين ظابط داخليه من قسم عابدين وهذا الظابط متذكر أسمه حتى الآن لكن مش حذكره وأهانها ولما قالت له خلى بالك انا مرات الظابط فلان الفلانى بتاع الجناح الخاص ومش حسيب حقى فزادت أهانته لها وصمم على أحتجازها فما كان من هذا القائد إلا أنه أصطحب مدربى الجناح الخاص فى سيارتين من بتوع الجناح الخاص وسافر القاهره وكان فيه عرف معمول به ايامها ممنوع على الشرطه العسكريه نهائيا الأحتكاك بأى فرد صاعقه فى الشوارع والطرق ووصل قسم عابدين وحصلت مجزره وطلع مراته وأخد ظباط قسم عابدين بالكامل أسرى وحطهم فى سجن مدرسة الصاعقه .... أتدخل كمال حسن على بسرعه وأمر بالأفراج عن ظباط الداخليه وحصل كلام كبير قوى فى الصحف والدنيا هاجت ... طلع نبيل شكرى فى تصريح صحفى وقال الظابط (( .......... )) مجابشى حقه وأنا اللى حجيب حق رجالتى
■■ السادات طبعا كان عارف شعبية نبيل شكرى الجارفه بين قوات الصاعقه وخشى من تطور الأمور وفورا رقى نبيل شكرى ترقيه أستثنائيه للمره الثانيه وأستحدث منصب جديد وهو مستشار رئيس الجمهوريه للقوات الخاصه وعين فيه نبيل شكرى وبكده ابعده عن القوات الخاصه وعين مكانه العميد محمد الزفتاوى
■■ المعلومات اللى موجوده على ويكيديا قبل ماحد يجرى ويجيبها كلها مغلوطه خصوصا ترتيب قادة قوات الصاعقه لأن الزفتاوى كان بعد نبيل شكرى وليس قبله ولم يتولى رئاسة الكليه الحربيه ولكن عين قائدا لسلاح الصاعقه ولم يكن قائدا للسلاح وقت حرب أكتوبر بل كان قائد مجموعه والصاعقه عباره عن مجموعات زى 127 و 136 وبكل أمانه أمام الله الراجل له بطولات رهيبه فى حرب أكتوبر سيظل التاريخ يذكرها له كأقوى قائد مجموعة صاعقه فى حرب أكتوبر وأى عاقل وواعى وفاهم حيلاحظ تضارب المعلومات على ويكيديا لأن اللى بيكتبها ناس عاديين زى حالاتى تمتلك قدرات الكترونيه شبه عاديه وأنا بنفسى بعدل فى معلوماتها كتير ومش محتاجه تقنيه ولا حاجه وكل اللى محتاجاه واحد فاهم يعدل أزاى وياريت يبقى عندنا أمانه فى النقل والنشر أحسن الصراحه الموضوع بقى يزهق
🇪🇬
ليست هناك تعليقات:
إرسال تعليق